ВАТРА

ЛЕМКІВСКА ВАТРА НА ЧУЖЫНІ в МИХАЛОВІ

ВАТРА, ОГЕН – при ним кормили тіло і душу поколіня Лемків.

Од 1979 рока, на початках, жменька лемківской молодежы орґанізувала в Михалові так зване Огниско, котре од 1983 рока названо Лемківском Ватром, а пак, в 1990 році приняло назву Лемківска Ватра на Чужыні і од того часу його орґанізацийом заняло ся Стоваришыня Лемків.

Лемківска Ватра на Чужыні є циклічном імпрезом, одбыват ся каждого рока в перший викенд серпня. Посвячена є лемківскій традициі і музыці, што дає шансы на автопрезентацию меншыны, комунікацию і потужаня культуровой достоменности.

Поступуючы едициі фестівалю приняли ідею презентациі не лем продолжаня і метаморфозы лемківской культуры, але шырше – русиньской культуры з Европы, а і зо Світа. Великом популярністю тішат ся тіж концерты ансамблів презентуючых музыку цілком інчых етнчных обшырі, такых сербскій етно-панк ци клезмерску музыку. А вшытко тото в наймодернійшых аранжациях выконуваных на высокым артистычным рівни.

Што рока в проґрам Ватры вписуют ся тіж інчы подіі о цілком сучасным характері. Презентациі документальных фільмів о забытых культурах, варштаты для наймолодшых. Остатні рокы принесли урочыстіст вручаня статуеткы Никыфора (Епифана Дровняка) – за заслугы для лемківской культуры.

Запрашаме Вас на Ватру в Михалові, в подорож для гляданя загыбаючой в ґльобальным світі етнічной ріжнородности.