70. річниця выгнаня Лемків – два выізды на центральны упамятніня

28. квітня/апріля 1947 рока зачала ся злочынна Акция Вісла, в наслідстві котрой выгнано Русинів з Лемковины на понімецкы землі Польщы. З той причыны лемківскє середовиско заплянувало упамятнити тоты траґічыны подіі, орґанізуючы в днях 28.-30. квітня/апріля т.р., спомины 70. річниці выгнаня.

В звязку з плянуваным порядком споминів (залучений долов), якы пройдут на Лемковині, пак в дальшых місцях, жебы конечно скінчыти на чужыні, орґанізаторы рішыли оголосити два выізды, вдяка котрым особы, якы чуют моральний обовязок быти в тот ден разом – могли бы взяти участ в центральных подіях, якым дано наголовок: Лемкы 1947-2017.

• Ліґниця-Чертіжне-Ґорлиці-Краків-Явожно-Ліґниця – выізд зачне ся в пятницю (28.04), о 6.00 год. з Ліґниці, одкале родакы зо заходу достали бы ся до загыбшого села Чертіжне, де на місцевым теметові буде одслужена панихіда за жерты Акциі Вісла. Дальше бус переіхат до інституциі культуры – Руской Бурскы в Ґорлицях, де пройдут дальшы подіі повязаны з лемківском частю споминів. На наступний ден (субота, 29.04), участникы переіхают до Кракова, де в Collegium Maius Ягайлоньского Університету буде проходила наукова конференция, повязана з річницьом. В тот сам ден, бус завезе заінтересуваных до Явожна, де на місци бывшого лаґру, в котрым страдали нашы предкы, одбудут ся дальшы упамятніня. По них, одбуде ся выізд назад на захід, де наступного дня, в неділю (30.04), одбуде ся тзв. західня част обходів. В справі орґанізациі сесого выізду дзвонте під номер: 726 349 472 – Севериян Косовскій.
• Ґорлиці-Краків-Явожно-Ґорлиці – выізд в суботу рано з Руской Бурсы в Ґорлицях, жебы пак од 11.00 год. взяти участ в науковій конференциі в Кракові. Дальше вєдно зо «західнім бусом» участникы переіхают до Явожна. На вечер «лемківскій бус» верне до Ґорлиц. Жебы дознати ся більше о тым выізді, дзвонте під номер: 535 898 118 – Моніка Тылявска.

50% квоты переіздів буде оплачене з соспільных середків, якы повело ся позыскати орґанізаторам. Другу половину оплачают участникы. Детальны інформациі о центральных упамятнінях неодолга помістиме на нашым портали.

Проґрам упамятніня 70. річниці. Про деталі будеме неодолга інформувати.

фот. скрін з фільму Андрия Копчы – Акция Вісла «Выгнаня», 2004 р.