З жальом інформуєме, же 8. грудня/децембра 2015 рока, вмер бл.п. Михал Романяк. Похоронны богослужыня одбудут ся 10. грудня/децембра т.р., o 09.00 год., в православній церкви св. Михала Архангела в Михалові, а пак на цмонтери в Тшебніцах.

Михал Романяк народил ся в 1937 році, в селі Фльоринка, на західній Лемковині. В 1947 році, як більшіст Лемків, был выгнаний з рідной землі і привезений на Нижній Шлеск. На чужыні, як вельо інчых Фльоринчан, трафил до села Михалів к. Любіна, де прожывал долгы рокы. Ціле своє жытя был звязаний з лемківскыма справами. Коли в 80. рр. ХХ ст. родила ся в Михалові ідея Лемківской Ватры, все служыл помочом і был єдным з єй орґанізаторів, а пак почестным старостом. З його ініциятывы в 50. річницю ганебной Акциі Вісла станула в Михалові капличка, припоминаюча о выгнаню Русинів з рідной землі, попри котрій находит ся камін з таблицьом в лемківскым языку: 07.07.1947 – 50 літ тому ту зме приіхали – 07.07.1997. В 60. річницю выселіня, разом з другыма Лемками памятаючыма выгнаня, шыроко оповідал о своіх пережытях вчас ХХVII Лемківской Ватры на Чужыні. Был долголітнім членом Стоваришыня Лемків та делеґатом на перший конґрес той орґанізациі.

Ціле своє жытя был заанґажуваний в церковне жытя михалівской громады. Нюс послугу церковного старосты, а до кінця своіх днів был дяком церкви св. Михала Архангела в Михалові, котра як перша, а такой єдина на чужыні, была побудувана в традицийным західньолемківскым стилю.

Вічна Йому Памят!

За тым мотузком можете послухати інтервю з п. Михалом Романяком, котре было проведене для радия лем.фм в 2012 р. А долов – в фільмі про Лемківску Ватру на Чужыні і 50. річницю Акциі Вісла – од 00:37 секудны выступує Михал Романяк.