Шторічне Свято Меду і Вина в Пшемкові на Нижнім Шлеску притігат вельо участників. Но, окрем місцевых жытелів місточка, приходят своі меды і вина презентувати продуценты з цільой Польщы, ачий заграниці. Од років сеса подія то тіж міцна акцентация русиньской культуры, котра на тій обшыри – не по своій волі – еґзистує уж бодай сімдесят років. В Пшемкові і околичных селах мешкат днес вельо Лемків. В оным реґіоні ґрупує ся єдно з найбільшых центрів лемківского населіня в Польщы по выгнянях в 1947 р. Приняло ся тіж повіджыня, котре підкрислят чысло Русинів в тых околицях: Пшемків – столиця Лемків. Повіджыня, хоц з першого зору мож брати позитивно, на жаль, вказує на смутну траґедию примусового оселіня на розшабруваных понімецкых землях.

Лемківскій акцент в Пшекові є гідний. Од початку ХХІ ст. основано гын одділ найстаршой лемківской повыселенчой орґанізациі – Стоваришыня Лемків. То завдякы діяльности і підпорі той же орґанізациі околичны Лемкы мают нагоду продолжати знаня языка (покликано пункт вчыня лемківского), інтеґрувати ся на деякых подіях, та рішыньом СЛ был покликаний Лемківскій Ансамбль Пісні і Танця «Ластівочка», котрий фунґує завдякы позыскуваній Стоваришыньом Лемків міністерияльній дотациі. З Пшемкова походит тіж бодай найшырше знаний Лемко молодого поколіня – Ігор Гербут. З місточка вышли тіж дві сестры – Рамона та Наталія Бочнєвич, котры, творячы ґрупу «Сестры Бочнєвич», презентувют цікавы пропозиці авторской як і народной лемківской музыкы.

На ХVII Святі Меду і Вина буде мож взріти власні два речены ансамблі: стоваришыньову «Ластівочку» та «Сестры Бочнєвич». Перший лемківскій акцент почути буде мож в суботу, 24. вересня/септембра т.р., де о 16.00 год. выступлят пшемківскы сестры. Другого дня подіі, в неділю (25.09), од 15.30 год. сцену займут артисты з «Ластівочкы» та маленькы «Ластівчата», будучы гейбы наступцями старшых камаратів.

Традицийом пшемківского свята сут шторічны богослужыня в святыни даякой конфесиі, фунґуючой на териториі міста. Влони Свята Літургія одбыла ся в грекокатолицкій цекрви свв. Космы і Даміана, тот рік екуменічна молитва пройде в римокатолицкым костелі (осіля Нова Гута в Пшемкові), а о рік од нова зачне ся богослужыньом в православній церкви св. Михала.

АВТОР: Севериян Косовскій
ДАТА: 10.09.2016
www.lem.fm