Делеґация СЛ на гробі бл. п. Михала Сандовича (1939 – 2003)

В неділю, 12 жолтня 2025 рока делеґация Стоваришыня Лемків пришла на цмонтір в Ждыни, штобы оддати чест для бл. п. Михала Сандовича, лемківского активісты, члена нашой орґанізациі і Заступці Ведучого Головного Заряду. 

Михал Сандович одышол несподівано 22. грудня 2003 рока. Был внуком священномученика Максима Ґорлицкого. Основал і был Ведучым Фундациі Підпоры Лемківской Меншыны «Рутеніка» 

В першій части фабулярного фільму Андрия Копчы, «Акция Вісла – Выгнаня» заграл ролю священника. Не діждал другой части.

Михал Сандович записал ся тіж в лемківскій літературі. Головно в поєдных номерах часопису «Бесіда» вказaли ся його вершы, репортажы і оповіданя. Своі вершы перший раз публично представил на ІІІ Лемківскій Творчій Осени в 1995 році. Был автором м.ін. верша «Колысанка», твору, якій выконувала Лемковина з Білянкы, а тіж прозаічных текстів, такых як «Мамина лыжка», «Однайти себе», «Почаівска Божа Матір зо Ждыні» ци «Професор».

За словами Андрия Копчы то Михал Сандович был думкодавцьом Нагороды ім. Никыфора – Епіфана Дровняка (сам запрезентувал первістный выгляд статуі). Ідея была введена в жытя такой декаду пізнійше стараньом Ведучого Стоваришыня Лемків (першыраз была признана в 2012 р.).

Вічна Йому Памят!