В віторок, 11 марця 2025 рока одбыло ся постійне засіданя Головного Заряду Стоваришыня Лемків. Постійне зато, што початком рока рішено, же члены ГЗ СЛ будут ся одтепер стрічати раз в місяци, все в другій віторок місяця.

Засіданя одкрыл Ведучый Андрий Копча і представил проґрам. 

Вчас стрічы бесідувано на тему ХVIII Світового Конґресу Русинів, якій того рока одбуде ся в днях 12 – 15 червця в Румуніі. Стоваришыня Лемків выбрало першых членів лемківской делеґациі на Конґрес, якы поідут до Бухаресту. 

Порушено тіж інчы справы. Серед них была тема будовы вежы на Святій Горі Явір і місця, якє має припоминати о бытности барскых конфедератів. Согласно выражено спротив будові в місци, якє односит ся не лем до духовой, але і культуровой спадковины Лемків. Так само выражено непокій і спротив што до плянів побудуваня інсталяциі, де будут припоминаны конфедераты. Заряд зазначыл, што нашы предкы были перешлідуваны конфедератами і жытелі Лемковины вытерпіли од іх присутности вельо злого.

Проф. Олена Дуць-Файфер здала реляцию зо стрічы з Комітетом Експертів Рады Европы, яка посвячена была охороні лемківского языка. Стріча одбыла ся 14 лютого 2025 рока во Вроцлаві. Брал в ній участ тіж Севериян Косовскій, Секретар ГЗ СЛ. 

Рішано так само в справах повязаных з орґанізацийом 45. Лемківской Ватры на Чужыні, яка одбуде ся в днях 8-10 серпня в Михалові. 

Головный Заряд

Стоваришыня Лемків