Стоваришыня Лемків, найстарша по політичных перемінах 1989 рока лемківска орґанізация в Польщы, презентує календар орґанізуваных ньом подій на 2018 рік:

    ▪       19.-20. мая – Х Медженародне Бієнале Лемківской/Русиньской Культуры в Креници (орґанізує креницкій Кружок СЛ);

    ▪       3.-4. серпня/авґуста – ХХХVIІІ Лемківска Ватра на Чужыні в Михалові;

    ▪       13.-14. жолтня/октобра – XXVI Лемківска Творча Осін;

    ▪       жолтен/октобер (точний термін не єст іщы знаний) – ХII Стрічы Трьох Поколінь з Лемківском Культруом (орґанізує креницкій Кружок СЛ);

    ▪       листопад/новембер (точний термін не єст іщы знаний) – ХХVІ Стрічы з Лемківском Культуром в Ґожові Великопольскым (орґанізує ґожівскій Кружок СЛ);

    ▪       5. грудня/децембра – Ден Русина в Польщы – 100. річниця віче во Фльоринці, якє дало початок Рускій Народній Республиці Лемків. З той нагоды русиньскы орґанізациі в Польщы плянуют вєдно честно одсвяткувати округлу річницю віче.

В рамках річной діяльности СЛ выдає двомісячник «Бесіда», якій безперерывно выходит од 1989 рока. Того рока печатаний буде і «Лемківскій Річник 2018», якій в більшости присвячений буде 100. річници фльориньского віче і подіям повязаным з народовотворныма аспірациями Русинів з Лемковины.

Окрем того, в поєдных Кружках Стоваришыня Лемків можут быти орґанізуваны і другы акциі. О вшыткых подіях та деталях з нима повязаных будеме іщы шырше інформувати на нашым портали. Радийо ЛЕМ.фм буде тримало медияльний патронат і, на міру технічных можливости, приносило реляциі (в тым нажыво) з вычысленых горі подій.