Oдсвяткувано 30-літя часопису «Бесіда» і 35-літя явліня ся першого по войні лемківского часопису «Голос Ватры».

przez adminsl . · Opublikowano 16 lipca 2019 · Zaktualizowano 19 lipca 2019

В минулу пятницю торжественні одсвяткувано 30-літя часопису «Бесіда» і 35-літя явліня ся першого по войні лемківского часопису «Голос Ватры».
Конференцийна саля Містецкого Підприємства Комунального Ґаздуваня в Креници выполнила ся гістми. Конферансєром імпрезы был редактор радия ЛЕМ.фм, Севериян Косовскій, а з вводным словом выступил ведучый Стоваришыня Лемків, Андрий Копча. Пак особисты спомины представил Петро Трохановскій, од початку істнуваня часопису «Бесіда» його головный редактор. Реферат на тему Як «Бесіда» формувала лемківскіст? Стратеґіі буджыня лемківской достоменности хоснуваны в Бесідовых дописах выголосила абсольвентка лемківской філолоґіі, докторантка Ягайлоньского Університету, Марта Ватраль.
Петро Трохановскій отримал нагороду од Містецкой Бібліотекы в Креници, з котром од долгых років спілпрацує. Редакторови ґратулювали і другы присутны. Подію прикрасил артистичный проґрам в выконаню Сусанны Ярой, котра одспівала 2 співанкы авторства Петра Трохановского, Юлиі Дошны, котра єдну співанку выконала соло, а другу в дуеті з Петром Трохановскым.
На конец з красным выступліньом вказал ся ансамбль Барвінок зо Словациі. Петро Мурянка підкрислил, што в писмі вказали ся тексты більше як 200 авторів. Барз подякувал вшыткым за присутніст, а пак запросил на малый почастунок, котрым тіж закінчено святкуваня.

АВТОР ДОПИСУ : Наталия Клинковска з ЛЕМ.фм
ЗНИМКЫ : фот. Петро Басалига

Веце знимок :
– https://www.facebook.com/lutowodnik/media_set?set=a.2410780419181235&type=3
або гев:
– https://photos.app.goo.gl/abt8wM2wXFTmYgrV8

Од редактора Бесіды:

Мам дяку, але і обовязок дакус выпростити, але і дополнити вышній допис.
Отже – од Містецкой Бібліотекы в Креници отримал єм прекрасне квітя (а не даяку особливу нагороду). Зас нагороду – гарду грамоту отримал єм од Головного Заряду Стоваришыня Лемків, а Бесіда як часопис доцінена остала через Світову Раду Русинів з єй Ведучым, др. Штефаном Лявинцьом (Будапешт), вручыл же ю в часі свята Член Світовой Рады Русинів Мартін Караш зо Словациі. І іщы єдно дополніня: в артистычній части свята выступил тіж выдатный гушляр Лемко – др Мариюш Мончак, што – беручы до увагы далеку, а специяльну подорож – барз сой ціню.

Петро Трохановскій