VIII Конґрес СЛ зыйде ся з тридцетом річницьом основаня орґанізациі

В першу суботу квітня/апріля 2019 р. в сідибі Стоваришыня Лемків в Ліґници одбуде ся VIII Конґрес орґанізациі. Пройде він на фоні 30. річниці од основаня той першой повыселенчой русиньской орґанізациі в Польщы. В проґрамі, окрем орґанізацийных справ, передвиджено і част посвечяну упамятніню подій сперед трьох декад.

Як поінформувал ведучый Головного Заряду СЛ, Андрий Копча, конґрес одбуде ся 6. квітня/апріля о 10.00 год. Підчеркнул тіж, же тота дата такой точно сходит ся з округлом річницьом од зареґіструваня стоваришыня, понеже односит ся до памятной даты  7. квітня/апріля 1989 р. Зато же на конґресі дата тота буде припомянута одкрытьом выставы, яка представит архівальны документы, фотоґрафіі та найбільшы успіхы за остатніх тридцет років діяльности. А окрем того, што СЛ возникло як перше по політичных перемінах, до успіхів зачыслити мож хоц бы скоре влучыня ся до світового русиньского руху. СЛ было єдном зo основательскых орґанізаций Світового Конґресу Русинів. Окрем інчого, за основне треба брати факт, што СЛ было ініциятором ввведіня наукы лемківского языка до основных і середніх шкіл, як тіж підпераня орґанізувати лемківску філолоґію. Вєдно з 30. літьом діяльности, члены стоваришыня святкувати будут і 30. річницю од выданя першого чысла двомісячника «Бесіда», што як раз мало місце 30. червця/юнія 1989 р.

Формальны пункты ближучого ся конґресу, то м.ін. представліня справопису з діяльности Головного Заряду за 2015-2019 рр. та выборы новых членів заряду. Вельо емоций можут выкликати выборы нового ведучого орґанізациі прото, што дотеперішній предсідатель СЛ, Андрий Копча, заповідал, што кінчуча ся каденция являт ся його остатньом при ведіню орґанізациі. Як інформувал він нашу редакцию, окрем спомненых пунктів проґраму, основным тіж буде приняти пропонуваны зміны до статуту, якы мали бы конечно го одсвіжыти і пристосувати до теперішніх реалий. Тото, ци фактично стоваришыня выбере нового ведучого, залежало буде од охочых кандидатів вести орґанізацию в будучій каденциі 2019-2023 рр.

На конґресі пристуны будут члены уступуючого заряду, делеґаты выбраны перше в локальных кружках та запрошены гості. Сут нима предовшыткым особы, якы стояли при СЛ од самых його початків, а тіж особы заслужены для лемківской громады. Дотепер одбыло ся сім конґресів, а окрем них і штырі Надзвычайны Конґресы, якы были посвячены текучым проблемам і внескам складаным членами орґанізациі. Першый – історичный – конґрес Стоваришыня Лемків одбыл ся 8. грудня/децембра 1990 р. в Ліґници.

фото: президия ІІ Надзвычайного Конґресу, 2016 р.

АВТОР : СЕВЕРИЯН КОСОВСКIЙ
ВВВ : http://www.lem.fm/viii-kongres-sl-zyiyde-sya-z-tridtsetom-richnitsom-osnovanya-organizatsii/