Вмер Димитрий Трохановскій (1943 – 2024). Вічная Памят!

Зо смутком заявляме, што вмер Димитрий Трохановскій, бывшый актор аматорского Театру Стоваришыня Лемків, участник культурного жытя Лемків. 

Митро Трохановскій вродил ся 17 жолтня 1943 рока в Білцаревій. Як маленькій хлопец был зо свойом родином выселеный в 1947 р. на західні землі Польщы. Долгы рокы учытелювал в Ліґници.

«Пізнал єм Покійного під конец 1988 рока. До кінця липця 1989 рока прібувал головну ролю Штефана і заграл єй на прапремєрі пєсы Одтяты коріня в Ліґници, а пак на VIII Лемківскій Ватрі в Бортным. Зараз потім выіхал до Канады, а в ролю Штефана обнял Лука Возняк» – споминат Покійного Ведучый ГЗ СЛ, Андрий Копча.

Опрацувал і выдал книжку посвячену роду Трохановскых з Білцаревы.

Покійный Димитрий Трохановскій одышол 11 грудня 2024 р. в Ґорлицях. Послідній період жытя прожыл на рідній Лемковині. Похореный был 14 грудня на цмонтери в Ганчовій.

Головный Заряд Стоваришыня Лемків передає щыры слова спілчутя родині і близкым Покійного.

Вічна Йому Памят!

—

Пониже знимкы з проб до спектаклю Одтяты корені, 1989 рік. Фот. Архів СЛ.