Володислав Грабан з Нагородом ім. Никыфора

Стоваришыня Лемків переказалo на рукы Володислава Грабана статую – Нагороду ім. Никыфора – Епіфана Дровняка. Лавреата одвиділа наша делеґация, на челі з ведучым ГЗ СЛ Андрийом Копчом. Было тото в неділю, 12 жолтня 2025 рока. 

Нагорода ім. Никыфора єст признавана «за труд жытя одданый для лемківской культуры». Тогорічны лавреаты были оголошены в часі серпньовой Лемківской Ватры на Чужыні в Михалові. Окрем Федора Лабика, якій особисто был присутный на серпньовій Ватрі в Михалові, наороду признано для Петра Басалыґы і як раз для Володислава Грабана. 

Володислав Грабан то лемківскій пoета, писменник і соспільный діяч. Ініциятор першых Лемківскых Ватр – Пленеровых Варшатів Ансамблю «Лемковина», якы спілорґанізувал головні з Петром і Ярославом Трохановскыма. Великій вклад внюс тіж в діяльніст Музею Лемківской Культуры в Зындрановій, анґажуючы ся в орґанізацию свят «Од Русаль до Яна». Грабан, як поета, заініциювал першы Лемківскы Творчы Осени. Основал і вюл часопис зындранівского музею – «Загорода», а в рамках свого выдавництва «Наша Загорода» опубликувал творы сучасных лемківскых авторів, м.ін. Теодора Кузяка «Давно то были часы», «Догасаюча ватра», Семана Мадзеляна «Смак Долі», вершы Івана Фуджака «Туга». Як поета за свою творчіст был вельократно нагороджуваный.