Вмер Ярослав Шляхтыч (1933 – 2024). Вічная Памят!

З жальом інформуєме, што 22 січня 2024 рока одышол до Вічности бл. п. Ярослав Шляхтыч.

Покійный вродил ся 15 мая 1933 рока во Фльоринці, як сын Тевдора і Анны. В 1947 році, як каждый Лемко, был насильно і беззаконно депортуваный з рідной землі і привезеный до села Михалів, недалеко Любіна, на понімецкым Нижнім Шлеску.

Бл. п. Ярослав Шляхтыч был заслуженым членом Стоваришыня Лемків (приналежал до михалівского Кружка СЛ). Долгы рокы анґажувал ся в поміч при орґанізациі Лемківской Ватры на Чужыні.

Згідно з принятом традицийом, як найстаршый лемківскій жытель Михалова (а при тым і уродженец Лемковины), од 2017 рока был Старостом Лемківской Ватры на Чужыні – каждого рока мал гонір класти оген розпаляючый михалівску Лемківску Ватру. Остатню Лемківівску Ватру на Чужыні розпалил в 2023 році.

Похоронны богослужыня зачнут ся в пятницю о 18:00 год. Парастасом в церкви св. Михала в Михалові. Похорон зачне ся о 11:00 год. в суботу, пак Покійный спочне на цмонтери в Тшебницях.

Вічна Вам Памят!

Стоваришыня Лемків
Головный Заряд